كيف توفري اموالك عند شراء مستحضرات التجميل

السلام عليكم ورحمة الله وبركاته 

كيفكم جميلاتي 

بتكلم اليوم عن موضوع مهم وهو كيف توفرين فلوسك لما تشترين المكياج 

بما ان احنا بنات كثير تجذبنا هالأشياء وممكن نضيع فلوسنا كلها وبعدين نكتشف ان احنا شرينا اشياء مو في حاجتها ويصير مصيرها تستخدم مره وتنرمي

واكيد هالشيء صار مع اغلبكم ان ماكان كلكم وانا اولكم 

وهالشيء مزعج صراحه لما تشوفي شيء دافعه فيه ومصيره الدرج 

في هاذي التدوينه راح احاول اقول لكم عدة نصائح من وجهة نظري واتمنى انها تفيدكم

1-قبل لاتروحي السوق اكتبي وش هو اللي محتاجته جد من المكياج ولاتشترين غيره 

2-قبل لاتشتري اي شيء من المكياجات شوفي هل انت جد محتاجته ؟هل راح تستخدميه كثير ؟.

3-اطلبي عينات للمنتجات لو موجوده على شان تجربي المنتج اول وتتأكدي ان كان يناسبك ولا لا وخذي دايما معاك علب صغيره او حتى علبة عدسات نظيفه على شان لو ما اتوفرت عينات تطلبين منهم يحطون لك عينه ولا تنحرجين لأن ذا حقك وهالشيء في كل العالم ماعدا عندنا ساحبين علينا 

4- تأكدي ان كان الشيء يناسبك ويناسب نوع بشرتك ولا لا

5- لو كنتي مبتدئه لاتخاطري وتجيبي انواع غاليه وحتى لو كان عندك خبره شوفي دائما البدائل الأرخص زي ماك راح تلقين لها بدائل من الماركات الدرق ستور مثل نكس وريفلون وغيرهم جودتهم رائعه وتنافس الماركات العالميه الشهيره 

6-في بعض المنتجات تقدرين تستفيدين منها بكذا طريقه مثلا الروج تقدرين تستخدمينه كبلشر كريمي والعكس .

7-بعض المستحضرات مثل الفاونديشين لاتجيبين اكثر من اثنين واحد تغطيته خفيفه للطلعات الصباحيه والدوامات والثاني تغطيته ثقيله للمناسبات الكبيره والزواجات 

8-استغلي العروض دائما واعرفي متى اوقاتها 

وبكذا اكون خلصت التدوينه واتمنى تحبوها وتستفيدون منها