شاورما الدجاج

السلام عليكم ورحمة الله وبركاته 

كيفكم جميعا ان شاء الله ايامكم جميله وسعيده 

رجعت لكم اليوم بتدوينه جديده ووصفه جميله 

وهي شاورما الدجاج حبيت اطبخها لكم لأن كثير ناس يحبونها وانا من الناس اللي 

يحبونها وعلى فكرة طبخها جدا سهل ومايحتاج ابدا اي تعب 

ويلا نبدا

اول شي الكميه طبعا راح تكون على حسب حاجتك بالنسبه لي استخدمت صحنين صدور دجاج مبرده وقطعتها اوصال صغيره وتبلتها بكل مايقع بيدي علبة زبادي خالي الدسم وسماق وباربريكا وملح وفلفل وكمون وبصل بودره وثوم بودره وبهار الليمون 

وحطيتها على النار في طاسه حاره من دون زيت او شيء لان الدجاج يطلع مويا فيستوي في مويته

لما يقرب يستوي راح نضيف شرائح بصل وشرائح فلفل رومي ونخليه على نار متوسطه

وهذا شكلها بعد ما استوت مافي اسهل من كذا  

بالنسبه لي سويتها ساندوتش بشريحتين توست بر مع شوية كاتشب 

وعلى فكره عادي تذيفون كاتشي او خردل او شطه اهم شيء ابعدوا تماما عن المايونيز لانه كارثه ولا تنخدعوا بمايونيز دايت هو صح ارحم من الثاني ولكنه يظل كارثه

وبكذا خلصنا ومالكم عذر مافي اسهل من كذا

ستيك اللحم بالمشروم

السلام عليكم ورحمة الله وبركاته 

كيفكم جميلاتي 

هاذي اول تدوينة لي عن الطبخ الصحي 

اول شيء حابه اقول لكم ان الطبخ الصحي مو شيء سيء وماينأكل وماله طعم

ولا انه عبارة عن خضار مسلوقه وصدر دجاج مسلوق زي ماكثير يفكرون 

بالعكس تمام 

حابه ان شاء في تدويناتي في هالقسم اغير نظرتكم للأكل الصحي واوريكم لذة ومتعة الأكل الصحي 

لأن الأكل الصحي مو حرمان تقدرين تاكلين كل الاكلات اللي تحبينها كل اللي عليكي تتعلمين كيف تطبخينها بطريقة صحيحه

واتمنى تحبون التدوينات اللي راح انزلها في هالقسم 

طبق اليوم راح يكون ستيك اللحم بالمشروم طبق لذيذ واتمنى تجربونه ويعجبكم واي وحده تجرب اي وصفه اتمنى تصورها وتسوي لي تاق في الانستغرام 

ويلا نبدأ بعد القرقره الطويلة

نحط ملعقة زيت زيتون صغيره ويفضل في طاسه غير قابلة للالتصاق على شان لاتحتاجوا زيوت كثيره ولا تتعبون

وبعدين راح نحط شرائح الستيك في الطاسه ونرش عليها ملح وفلفل اسود على نار هادية

لما تاخذ لون راح نقلبها لان احنا مانبيها تستوي احنا بس نبيها تىاخذ لون 

هنا بعد ماخلصنا كل الكميه اللي عندنا  واخذت لون

وبعدين في نفس الطاسه راح نحط ملعقه صغيره زيت زيتون ونخليه لما يسخن راح نحط عليه بصله كبيره مفرومه ونحط عليها ملعقه كبيره دقيق بر ماعندكم عادي حطوا دقيق ابيض عادي

وراح نقلب لما يذيل البصل

لما يذيل البصل راح نحط عليه شرائح الستيك ومشروم شرائح وراح نحط مويا على شان يستوي اللحم وطبعا لاتنسون البهارات بالنسبه لي اكتفيت بملح وفلفل مع(بصل وثون يودره وطبعا هذا اختياري) لكنهم يعطون الأكل طعم لذيذ انصح اللي ماجربوهم قبل يشتروهم ويجربوهم

بعدين راح نغطي الطاسه ونرخي النار علىى الأخير

.

بالنسبة لي قدمته مع بطاطس مسلوقه وشوربة عدس وطبعا تقدرون تقدمونه مع اي شيء انتوا حابينه

وبالعافيه 

واتمنى تعجبكم التدوينه

تحدي يا انا يا انتا البارت الثالث

السلام عليكم ورحمة الله وبركاته 


ورجعت ثاني بمنتجات خلصتها من تحدي يا انا يا انتا 


صراحه مررره مليت من التحدي وفي خاطري اشتري مره وماسكه نفسي لان لسا 

عندي اغراض مررررررررررره كثير ولازم اخلصها اول 

حاسه اني اتعذب ابي اشتري ***فيس يبكي 

والظاهر ان احنا ىمطولين في هالتحدي

المهم هاذي هي المنتجات اللي خلصتها 

صورة جماعيه

اول شيء سيروم دابر املا اشتريته ودسيته لان كان عندي منتجات كثير يوم فتحته لقيته كله مطشوش طلع انه ماكان مقفل كويس للأسف واستخدمته اربع مرات بس للأسف بس صراحه مررره حبيته لأنه مره خفيف ويعطي الشعر لمعة جميله حبيته اكثر من سيروم كرستال وناويه اشتريه مره ثانيه ان شاء الله

مقشر شفا بالفراوله 

ريحته ريحة حلاوه وقوامه كريمي في حبيبات تقشير ناعمه على البشره حجمه كبير وسعره رخيص اشتريته ب12ريال .

بالنسبه لي مره احب استخدمه في تقشير جسمي اوزعه على جسمي كله وبعدها ابدي افرك بليفه خشنه 

ميزته سعره وحجمه وانك سهل تلقيه سواء عند العطار او محلات التجميل 

نجي الحين للأسكنول معشوق الملايين مره احبه وما استغنى عنه ابدا قد اتكلمت عنه في الانستجرام احس اني اكون في حاجته مره لما اطلع برا واحطه على قطنه وامسح وجهي ورقبتي واشوف البلاوي اللي تطلع 

اشوف الأسكنول منظف مثالي جدا وانصح كل وحده يكون عندها وفي منه عدة انواع وسعره 7 ريال فقط

نجي الحين لكريم دوف لليدين بزبدة الشيا قد تكلمت عنه ترطيبه جميل لكن ريحته جميله بس كان في شيء مخربها يعني ريحه حلوه على ريحه مو حلوه مدري كيف اكثر شيء جذبني له ان من مكوناته زبدة الشيا وحجمه مرره مناسي للشنطه وماراح اشتريه ثاني لاني حابه اجرب انواع ثانيه اتوقع سعره 15 ريال 

مرطب الشفاة من ذي بودي شوب الفراوله اتذكر يوم كنت احطه في المدرسه كل القروب يقولون في ريحة فراوله ريحته مره تفوح وريحته جميله وترطيبه عادي ومايطول بس شكله لذيذ يعطي لون خفيف يبان مره طبيعي ومافيه شيمر قأحب استخدمه للدوام

وبكذا اكون خلصت التدوينه

كب كيك االشوكلاته

السلام عليكم ورحمة الله وبركاته 

كيفكم جميلاتي ؟ان شاء الله كلكم بخير ومبسوطين 

جبت لكم اليوم حلو صحي ولذيييذ وسريع جدا

كب كيك الشوكلاته السريع 

طعمه جدا لذيذ ومحد بيتوقع انه صحي 

لكن طبعا مو تاكلون عشر حبات تقولون صحي مافي مشكله حبتين او ثلاث كويسه

وفي هالتدوينه راح تعرفون ان الأكل الصحي مو حرمان ابدا 

ويلا نبدي

ملعقتين كبيره دقيق اسمر

ملعقه كبيره كاكاو بودرة

ربع ملعقه كبيره باكينج بودر

ملعقتين كبار عسل ولو عندكم بديل سكر يكون افضل لكنه خلص من عندي فاستبدلته بعسل

بعدين اضيفوا حليب خالي الدسم واخلطوه لين يصير قوامه مثل قوام الكيك

اخر شيء نضيف ربع ملعقه صغيره فانيلا

وبعدين حطيت الخليط في قوالب الكب كيك الورقيه ودخلتها المايكرويف لمدة دقيقه

وقدمتها مع القهوه

طبعا تقدرون تدخلونها في الفرن بعد الكميه سوت لي ثلاث حبات اهم شيء لاتعبوا الكوب لأنها راح تنتفخ شوي انا سويت كميتين تقدرون بعد ماتحطون كل المكونات تذوقونها على شان تتأكدون من حلاوتها ان كانت تناسبكم ولا لا جربوها واكيد راح تعجبكم 

وبكذا اكون خلصت ان شاء الله التدوينه تكون نالت اعجابكم